Qarabag Media
Haqqımızda Əlaqə

Milli Qəhrəman Koroğlu Rəhimovun xatirəsinə…


Tarix:3-07-2016, 23:22 Kateqoriya:Manşet / Qəhrəmanlar

Milli Qəhrəman Koroğlu Rəhimovun xatirəsinə… Həyatda hər kəsin bir həyat yolu var. Həkimin, müəllimin, jurnalistin həyat yolu olduğu kimi, qəhrəmanların da özünəməxsus həyat yolu vardır.
Həm də şərəfli bir həyat yolu…


Qəhrəmanların keçdiyi həyat yolundan onların göstərdiyi qəhrəmanlıqlardan çox danışmaq olar. Sizlərə bütün həyatını Vətən yolunda mübarizəyə həsr etmiş, qeyrətli Vətən oğlu, XX əsrin Koroğlusu, Koroğlu Rəhimovdan söz açacağam…

Koroğlu İsmayıl oğlu Rəhimov 1953-cü il oktyabr ayının 31-də Oğuz rayonunun Xaçmaz kəndində, müəllim ailəsində dünyaya gəlmişdir. 1972-ci ildə ordu sıralarına çağırılmış və hərbi xidmətini ADR-də başa vurmuşdur.

Koroğlu əmək fəaliyyətinə Bakı Məişət Kondisionerləri zavodunda başlamışdır. O, ermənilərin törətdikləri faciələrə biganə qala bilmədi və namusu, qeyrəti Vətən yolunda onu canından keçməyə vadar etdi. Növbəti illərdə baş vermiş hadisələr – 1988-ci il azərbaycanlıların Ermənistandan deportasiya olunması, 1990-cı il “20 Yanvar” hadisələri, 1992-ci il 26 fevral tarixlərində baş vermiş “ Xocalı soyqırımı ” Koroğlunun düşməndən qisas almaq , torpaqlarımızı erməni faşistlərindən təmizləmək arzusunu daha da alovlandırırdı.

O könüllü cəbhəyə getməyi qərara aldı. Qərarını atasına və həyat yoldaşına bildirir. Atası İsmayıl Rəhimov bu cür mərd, cəsur, qorxmaz oğul böyütdüyü üçün fəxr edir və ona xeyir –dua verir. Vətənimizi, ana bacılarımızı ermənilərdən qorumağı ona tövsiyə edir. Və nəhayət 1992-ci ilin mart ayının 17-də ordu sıralarına yazılır və aprel ayının 30-da “ N”saylı hərbi hissədə 2-ci motoatıcı bölüyün komandiri təyin edilir. Qısa müddət ərzində Koroğlunun qəhrəmanlığı dillər əzbəri olur.

Öz arzusu ilə Qarabağın qızğın döyüş gedən cəbhə bölgəsinə gedir. Goranboy rayonunun Buzluq, Çantaz, Erkəc kəndlərinin azad olunmasında onun başçılıq etdiyi bölük əsl qəhrəmanlıq göstərmişdir. Həmin döyüş zamanı düşmən məhv edildi, bir neçəsi əsir götürüldü, xeyli döyüş sursatı ələ keçirildi. Daha çox Başkənd, Madagiz, Gülüstan kəndlərini də qəhrəman komandir düşməndən azad etdi. Koroğlu buradakı döyüşdə dörd faşisti şəxsən özü məhv etmişdi. 14 iyunda isə cəsur döyüşçülər Mənəşlini də yaraqlılardan təmizlədilər. 15 iyunda isə Başkənd erməni işğalçılarından təmizləndi. Bu əməliyyatlar nəticəsində Koroğlunun komandirlik etdiyi alay erməni qəsbkarlarının onlarla canlı qüvvəsini məhv etdi, xeyli silah sursat ələ keçirdilər. 1992-ci ilin iyul ayının 3-də Koroğlunun komandiri olduğu bölük Ağdərə istiqamətində hücuma keçir. Bu döyüş qəhrəmanı bu şərəfli ada yüksəldən şəhid adını qazandırır.

Ağdərə döyüşlərində də Koroğlu qəhrəmanlıqlar göstərir. O, Ağdərə yaxınlığındakı üçüncü sovxozu da erməni faşistlərindən azad edir. Döyüşə-döyüşə qəhrəmancasına həlak olan Koroğlunun ölüm xəbəri hamını sarsıdır. Onun məzarı Bakıda Şəhidlər Xiyabanındadır.

Ölümündən sonra Koroğlunun “Azərbaycan”, “Vətən səsi”, “Azərbaycan ordusu” və digər qəzetlərdə qəhrəmanlığı haqqında geniş məqalələr yazılmışdır.

Milli Qəhrəman Koroğlu Rəhimovun xatirəsinə…

Böyük dövlət xadimi Heydər Əliyev gənc nəslin vətənpərvər ruhda böyüməsi istiqamətində mühüm addımlar atıb, Qarabağda döyüşlərdə şücaət göstərmiş qəhrəman Vətən övladlarını qiymətləndirib. Azərbaycan Respublikası Prezidentinin 16 sentyabr 1994-cü il tarixli, 203 nömrəli fərmanına əsasən Azərbaycan Respublikasının suverenliyinin və ərazi bütövlüyünün qorunmasında, Vətənimizin torpaqlarının erməni işğalçılarından müdafiə edilməsində gedən döyüşlərdə qəhrəmanlıqla vuruşaraq göstərdiyi şəxsi igidlik və şücaətə, öz müqəddəs əsgəri və xidməti borclarının şərəflə yerinə yetirilməsində göstərdiyi misilsiz xidmətlərə görə leytenant Rəhimov Koroğlu İsmayıl oğlu ölümündən sonra “Azərbaycanın Milli Qəhrəmanı” adına layiq görülüb.

Koroğlu Rəhimovun qəhrəmanlığına yazıçılarımız, elm xadimləri də biganə yanaşmırlar, Abdulla Qurbaninin “Koroğlunun Ağdərə səfəri”, Əli Qurbaninin “Koroğlular uzaqdan gələn yolda”, Qədir Aslanın “ XX əsrin Koroğlusu”, Oqtay Əliyevin “Əbədiyyətə qovuşan Koroğlu” kitabları nəşr olunmuş, 2-ci sinif Oxu kitablarında məlumat verilmişdir. Oqtay Rza Koroğluya həsr etdiyi şeirinin bir bəndində belə yazır:

Qəbri önündəyəm görəsən onun,
Gəzib damarında hansı duyğular,
Sübut eyləyib ki, qoç Koroğlunun,
Vətəndə evi də, məzarı da var.


2010-cu ildə Mədəniyyət və Turizm Nazirliyinin “Salnamə” kinostudiyasında istehsal olunan “Qarabağ qəhrəmanları” silsiləsindən 4-cü sənədli film Azərbaycanın Milli Qəhrəmanı Koroğlu Rəhimova həsr olunub. 10 dəqiqəlik sənədli filmin ssenari müəllifi Rəfiqə Məsud, rejissoru Kəmalə Musayeva, operatoru Rüfət Süleymanovdur. Sənədli ekran əsəri Koroğlu Rəhimovun keçdiyi şücaətli döyüş yolunu əks etdirən xroniki kadrlar üzərində qurulub.

Şagirdlər də onun qəhrəmanlığı qarşısında baş əyir və özlərini gələcəkdə Koroğlu kimi qəhrəman görmək istəyirlər.

Bakıda küçələrin biri Koroğlu Rəhimovun adını daşıyır. Koroğlu küçəsindəki Xiyabanda Milli Qəhrəmana abidə ucaldılmışdır. Onun adı və qəhrəmanlığı bütün Azərbaycan xalqının qəlbində əbədi yaşayacaq və nəsillərdən nəsillərə keçəcəkdir.
Milli Qəhrəman Koroğlu Rəhimovun xatirəsinə…

Minayə Nəsibova










SON XƏBƏRLƏR
Zelenski kadr islahatlarının anonsunu verdi
Petro Poroşenko prezident seçkilərində məğlubiyyətini etiraf edib
25 il öncə Lələtəpədə şəhid olan döyüşçülərin xatirəsi anıldı - FOTOLAR
Saakaşvili sabah Kiyevə qayıdır
Ermənilərin talan etdiyi Kəlbəcər – Ürək dağlayan ən son görüntülər – VİDEO
Fransanın Nant şəhərində Azərbaycan məktəbi açıldı
Gülnar Səmanın kitabının təqdimatı keçiriləcək
İncitdiyiniz insanların sayı-hesabı yoxdur
Jurnalistin vətəni
Jurnalistlərimiz Dağlıq Qarabağa niyə GETMƏLİDİR?
İlbər Ortaylı: “Sultan Səlimlə Şah İsmayıl kimi dava edəsi deyilik”
Mayın 29-da Putin və Paşinyan arasında görüş keçiriləcək
Ərdoğandan çağırış: "Seçki mübahisələrini geridə qoyaq"
"Azərbaycan(!) qızının gecə klubunda nə iti azıb ki?.." - Fikir savaşı
Azərbaycan və İranın birgə istehsalı olan avtobuslar satışa hazırlanır
Xəzərdə 6 milyard dollarlıq yeni layihəyə start verildi
Koçaryan Avropa liderlərini köməyinə çağırdı
Əhaliyə hava xəbərdarlığı
Azərbaycan dilinin 113 minlik yeni orfoqrafiya lüğəti hazırlanıb
"Qaz və işığa qoyulan limitin ləğvi məqsədəuyğun deyil" – Deputat
Azərbaycanda zorakılığa məruz qalan uşaqlarla bağlı qaynar xətt yaradılır
Pensiya və əmək haqları yenidən qaldırılacaq – Prezident bəyan etdi
Aqil ABBAS: TELEKANALLARI TELEKANALİZASİYAYA ÇEVİRMƏYİN
"Paşinyan Dağlıq Qarabağda rəngli inqilab etmək istəyir" - NƏZAKƏT MƏMMƏDOVA
Şərif Ağayar: "Laçın indi mənə çatmadığım, çata bilmədiyim bütün arzuların ümumiləşmiş obrazı kimi görünür" - MÜSAHİBƏ
İslam dininə üçlü yanaşma: Mühafizəkarlıq, Dünyəvilik, Millilik - (III yazı)
Prezident və birinci xanım Neftçilər parkının açılışında
Güclü külək və leysan yağışları Gürcüstanda ciddi fəsadlar törətdi
Müasir Azərbaycan Folklorşünaslıqda yeni nəzəri-metodoloji yanaşma təcrübəsi
Bakının şərtinə əməl olunmadıqca, eskalasiya təhlükəsi davam edəcək