Qarabag Media
Haqqımızda Əlaqə

Tank ovçusu...


Tarix:19-04-2016, 06:41 Kateqoriya:Manşet / Yazarlar

Tank ovçusu...

Ötərxan ELTAC
Laçını gah keçilməz qapı adlandırdıq, gah da alınmaz qala. Gah düşmən tələsi dedik, gah da qartallar oylağı...

Min dərdin dərmanı olan rəngbərəng çiçəklər, bir çox xəstəliklərə şəfa verən loğman bulaqlar, süfrələrin bəzəyi olan dadlı meyvələr, zəngin yeraltı sərvət: uran, dəmir, mis yataqları, gözəlliyi ilə hər kəsi heyran qoyan misilsiz mənzərələr və sağlamlığın rəhni olan, hətta günəş işığının keçə bilmədiyi gur meşələr yada düşür Laçın deyəndə. Hələ dərdlərin dərmanı olan beçə balını, ceyranlı-cüyürlü oylaqları, quşların cəh-cəhində mürgü vuran ormanları, şırıltısıyla ətrafa nəğmə qoşan Həkərini demirəm.

İgidliyindən, rəşadətindən söhbət açacağımız Nazim Xanlar oğlu Abdullayev 1967-ci ildə Həkəri sədalı Laçında doğulub. 1 saylı orta məktəbi başa vurandan sonra, Sovet ordusu sıralarında hərb elminin sirlərinə yaxından bələd olub. Ordudan tərxis olunan Nazim Vətənə dönəndə hiyləgər qonşularımızın torpaq iddiası ilə ayağa qalxaraq, iğtişaş törətdikləri zaman idi. Nazim də elə həmin vaxtdan dostları ilə birlikdə silaha sarılaraq torpaqlarımızın keşiyində durdu.

Silah-sursatın olmadığı zamanlar idi. Laçın özünümüdafiə dəstəsi ov tüfəngləri ilə silahlanmış, imperiyanın ağır texnikası ilə təmin olunan düşmənlə qarşı-qarşıya durmuşdu. Laçının oğullarının əsas silahı doğma torpağa, vətənə olan sonsuz məhəbbəti idi.

Şuşa istiqamətində ermənilərin fəallığı xeyli artmışdı, daha doğrusu qala-şəhər artıq mühasirədə idi. Şəhər düşmən əlinə keçəcəyi təqdirdə Laçının da mühasirəsi daralacaqdı. Ona görə də əsgərlərimiz var-gücü ilə müdafiə olunmağa çalışırdı. Amma namərd qonşularımız himayədarlarının köməyi ilə daha da irəliləməyə can atır, Laçın dəhlizinə nəzarəti ələ keçirmək istəyirdi. 31-ci posta edilən hücumlar da, dəhliz yoluna bir çıxış idi. O gün Nazimin və Familin sayıqlığı nəticəsində səfərbər olunan döyüşçülərimiz itirilmiş məntəqəni geri qaytarmaq üçün əks hücuma keçdilər. Düşmənin silah-sursatını ələ keçirməklə yanaşı, xeyli canlı qüvvəsi də məhv edildi. Əsgərlərimizin sərt təpkisi ilə üzləşən quldurlar geri çəkilməyə məcbur oldular.

Qaladərəsi strateji yüksəklik olduğu üçün quldurlar onu daim atəş altında saxlayırdı, çünki buradan Laçının, eləcə də Görusun böyük bir ərazisinə nəzarət etmək mümkün idi. Vəziyyət getdikcə ağırlaşırdı. Şuşa kimi alınmaz qala əldən getmişdi. Laçının mühasirəsi xeyli daralmışdı. Komandanlığın əmrinə əsasən, döyüşçülərimiz qismən geri çəkilməli, müdafiə mövqeyi seçməli idi. Bu əmr Nazim və digərləri tərəfindən birmənalı qarşılanmasa da, vəziyyət bunu tələb edirdi.
17 may 1992-ci il. Zabux kəndi ətrafındakı mövqelərimiz güclü atəşə tutulurdu. Ağanus kəndində də tək-tək evlər yanırdı. Düşmən artıq hər tərəfdən mövqelərimizi gülləbaran edir, postlar arasındakı əlaqələri kəsməyə çalışırdı. İrəliləmək mümkün olmadığı üçün Tikanlı zəmiyə tərəf çəkilən əsgərlərimiz düşmən mövqelərini atəşə tutsalar da, sursat qıtlığı və qeyri-bərabərlik uğur vəd etmirdi. Elə ona görə də yenidən Güləbirddə cəmləşən döyüşçülərimiz Səfiyan-Laçın istiqamətində hücumları intensivləşdirməyə çalışdılar.

Suarasında erməni hərbi birləşmələrinin fəallığı gözə çarpırdı. Bunu nəzərə alan komandanlıq kəşfiyyat qrupunu həmin istiqamətə yönəltdi. Nazim həmişə olduğu kimi Famillə birgə idi. Bir-birinə etibar, inam onları daha qorxmaz, daha ölümsüz edirdi. Meşə gur, qalın və çığırsız olduğundan irəliləmək çətin idi. Amma düşmən mövqeyini və hansı silahla təmin olunduğunu öyrənmək üçün əsgərlərimiz candan keçməyə hazır idi. Qəflətən erməni kəşfiyyatı ilə üzbəüz gələn Nazim silahdaşlarını ayıq olmağa səslədi. Və ilk atəşlə öndə olan erməni əsgərini yerə sərdi. Güllə dolu kimi yağmağa başladı. Ancaq əsgərlərimiz mövqe seçə bilmişdilər. Ona görə də, bir neçə dəqiqə çəkən döyüşdə 15 yaraqlı məhv edilərək, silahları qənimət kimi ələ keçirildi. O gün Nazimin qoçaqlığı sayəsində heç bir itkimiz olmadı.

Məlumat alınmışdı ki, Tığikdə qərarlaşan düşmən növbəti döyüş əməliyyatı üçün plan üzərində işləyir. Əməliyyatın tarixi haqqında xəbərlər bir-birini təkzib etdiyinə görə, növbəti dəfə kəşfiyyat dəstəmiz Tığik istiqamətində irəliləməyə başladı. Yenə də Nazim öndə idi qranatamyotu ilə birgə. O, qorxmazlığı və cəsarətilə hər kəsə örnək idi. Hər kəs ona güvənir, etibar edirdi.

Dəstə yavaş-yavaş irəliləyirdi. Sən demə, namərd düşmən anbaan izləyirmiş onları. Amma hər bir cığıra yaxşı bələd olan əsgərlərimiz diqqətdən yayınmaq üçün gizli yollardan istifadə etməklə, quldurları mühasirəyə salmağı bacardı. Bu dəfə də düşmən 7 əsgərini itirməklə geri çəkilir. Kəşfiyyat dəstəmiz yoluna davam edərkən, məlum oldu ki, Famil və digər bir nəfər mühasirədə qalıb. Nazim ani olaraq əlavə qüvvənin gəlməsi üçün qərargaha xəbər göndərdi. Amma Famil də Famil idi. Ölsə də düşmənə təslim olmazdı.
Nazim Abdullayev Laçın rayon polis idarəsinə baş çavuş rütbəsində işə qəbul ediləndən sonra, Qoşqar-Murov istiqamətində döyüşlərə qatıldı. Yenə də təcrübəsi, bacarığı ilə silahdaşları arasında seçildi, fərqləndi. Amansız döyüşlərdə düşmənə aman vermədi. Doğma Laçını itirəndən sonra, Kəlbəcərə sığındı, axı Kəlbəcər Laçının arxası-dayağı idi. Son damla qanına qədər vuruşacağına, geri çəkilməyəcəyinə and içdi. Amma düşmən himayədarlarının köməyi ilə Kəlbəcərə doğru irəliləyirdi....

Bir qədər sonra Nazim öz dəstəsi ilə digər qaynar nöqtəyə - Füzuliyə yollandı. Vəziyyət gündən-günə gərginləşirdi. Artıq Laçın və Kəlbəcəri işğal edəndən sonra, Qarabağa asanlıqla daxil olan düşmən öz döyüşçülərini lazımi silahlarla təmin edə bildi. Bu təminat isə, əsgərlərimizin hücumu qarşısına bir maneə oldu. Bütün bu çətinliklərə baxmayaraq, istər yerli özünümüdafiə dəstəsi, istərsə də Laçın polis batalyonu əzmlə, rəşadətlə döyüşür, bir addım belə geri çəkilmirdi. Nazim qranatamyotu ilə düşmənin bir neçə tankını və xeyli canlı qüvvəsini məhv etmişdi. Yaraqlılar Nazimin mahir nişançı olduğunu bir daha dəqiqləşdirəndən sonra, onu hədəfə götürdülər, amma Nazim o gün məharətlə nədəfdən yayına bildi.

Döyüş davam edirdi. Hər iki tərəfdən xeyli ölən və yaralanan vardı. Nəyin bahasına olursa-olsun Horadiz düşməndən təmizlənməli idi. Yenə də Nazimin qranatamyotu əks-səda verir, düşməni vahiməyə salırdı. Amma qəddar düşmən Nazimi neçə gün bundan öncə hədəfə almışdı. Çünki Nazim əsasən, tankların qarşısını almağa çalışırdı, bu da düşmən üçün ən böyük təhlükə idi.

Nazim yenə də silahdaşlarını döyüşə səsləyir, düşmənə qarşı amansız olmağa çağırırdı. Əsgərlərimiz də xeyli irəliləmişdilər, demək olar ki, yaraqlıların böyük hissəsi geri çəkilmişdi. Və birdən... və birdən “ay namərd”- deyərək Nazim əlini sinəsinə apardı.

Tank ovçusu...Əlləri qana bələnmişdi Nazimin. Qan axdıqca rəngi ağarırdı. Daha qranatamyotun səsi eşidilmirdi. Bir qədər sonra arıq bədəninə sığmayan dünya boyda ürəyi susdu. O gün ölümsüzlük tarixi yazdı Nazim, birliyimiz, bütövlüyümüz uğrunda ən ali məqama-şəhidliyə ucaldı.

Nazim Xanlar oğlu Abdullayev göstərdiyi rəşadətə görə, ölümündən sonra, “Azərbaycan bayrağı” ordeninə layiq görüldü. Allah rəhmət eləsin!

Karabakhmedia.az










SON XƏBƏRLƏR
İbrahim Tatlısəsi azərbaycanlı həkim sağaltdı
İraq Kərkükdən yenidən neft ixracına başladı
"Azərbaycan televiziyalarından bütün şou verilişlərini yığışdırardım" — Xeyrəddin Qoca
Azərbaycana qayıdan sabiq nazir yenidən xəstəxanaya yatırıldı
Gələn il pensiyalar 35% artacaq - Nazirdən açıqlama
Belçikada insan cəsədindən gübrə kimi istifadə ediləcək
Gələcək rektora müraciət
Deputat Mahir Abbaszadə yüksək vəzifəyə təyin olundu
"Müalicəmi bitirib Bakıya qayıdacağam" — Rasim Balayev
“Özünü pis kişi eləmə...” - “Qoy başına kül qoysunlar...”
Bakıda güclü yanğın: Alov məktəb və yataqxananı ağuşuna alıb
"Azərbaycanda əməkhaqları digər ölkələrlə müqayisədə çox aşağıdır" — Ziyad Səmədzadə
"Məndən küsüb, inciməyə nə var ki..." — Nizami Abbasovun şeirləri
Flora Kərimova nazirin yerində oturmasından danışdı: “Heç kimə heç nəyi keçməyəcəyəm”
Sənədləri qaydasında olan 114 şəhidin 146 vərəsəsinə birdəfəlik ödəniş edilib
Ərdoğan ABŞ-ın 3 PKK liderinin başına mükafat qoymasını “oyun” adlandırdı
Ukraynada polis rəisi olan azərbaycanlı xanım
Seçkilər heç nəyi dəyişməyəcək - Hədəf yenə Yaxın Şərq və İrandır
Yerli sakinlər və məcburi köçkünlər Bakı “Lift-təmir” İB rəhbərliyinə MİNNƏTDARLIQ ETDİ
Klinton yenidən prezidentliyə namizədliyini irəli sürmək istəyir
Türkiyədən bayraq gününə dəstək - FOTO
Mustafa Kamal Atatürkün ölümündən 80 il ötür - VİDEO
Bir kərə yüksələn bayraq bir daha enməz!
Qurban Qurbanov robot qapıçıya qol vurmağa çalışacaq
Xalq artisti Amalya Pənahova dəfn olunub
“Anamı gecə ilə aparıb Laçında dəfn etdik” - 54 gün mühasirədə qalan şəxslə müsahibə
“Bu çöllər bizə lazım deyil... torpaqları qaytarmağa hazırıq...” - Paşinyanın kitabı başına bəla olub
Bayrağı düşmənə verməyən oğul - NATİQ QASIMOV
Türkiyə və Türkmənistan Trans-Xəzər qaz kəmərini müzakirə ediblər
“...Qırmızı koftalı, yaşıl tumanlı...” — Xan Şuşinski bayrağımızı gizli musiqi ilə vəsf etmişdi