Qarabag Media
Haqqımızda Əlaqə

Belarus kişiliyi və Gürcüstan namərdliyi...


Tarix:1-02-2019, 22:32 Kateqoriya:Manşet / Yazarlar

Belarus kişiliyi və Gürcüstan namərdliyi...Elşad Paşasoy

Rəsmi Tiflis 2008-ci ilin qışında etdiyimiz böyük yaxşılığın əvəzini 2019-cu ilin bu qış günlərin “bizə qaytardı”.

Həmin ilin yayında Rusiya ilə Gürcüstan arasındakı 5 günlük müharibədən sonra qəzəblənmiş Kremlin təhdidlərinə baxmayaraq, Azərbaycan öz qonşularını donmaqdan xilas etmişdi...

Neçə gündür ki, Gürcüstanın Axalkalaki bölgəsində Xocalı canisi Mixail Avaqyana büst qoyulması səbrimizi daşırıb. İndi Zurab Qventsadze deyir ki, Avaqyana abidə ucaldılması Gürcüstandakı müəyyən erməniyönümlü qüvvələrin təşəbbüsüdür. Amma belə nağılları çox eşitmişik.

Bəli, gürcülər özləri də etiraf edirlər ki, bu erməni cəlladı həm də Abxaziyada gürcülərə qarşı döyüşüb, deməli, faktiki olaraq bu “erməni qəhrəmanı” Gürcüstanın da düşmənidir. Amma bunun bizə dəxli yoxdur. Söhbət Azərbaycan ərazilərinə soxulan, burada körpələri qətlə yetirən canidən gedir! Burada Gürcüstanın dar günündə hər zaman onun yanında olan bir dövlətə qarşı cinayətlər törətmiş cinayətkarın “qəhrəman” kimi sırınması faktı var.

Uzaq Belarus dövləti Dağlıq Qarabağa qanunsuz səfər edən bloger Lapşini Azərbaycana qolubağlı təhvil verdi, nə Rusiyanın, nə də İsrailin etirazlarına baxdı. Ermənistan da gecə-gündüz yaxasını yırtırdı, xeyri olmadı. Belarus Azərbaycana münasibətdə kişiyana davrandı, prezident səviyyəsində bəyan olundu ki, dar günümüzdə Azərbaycan hökuməti bizə 300 milyon kredit verib. Kredit e, a kişi!

Azərbaycan daha Gürcüstan üçün nələr etməyib?! Hələ güzəştli krediti bir yana qoyaq. Müstəqillik dövründə Azərbaycanın bir əli Gürcüstanın ağzında olub. Yeri gələndə öz vətəndaşlarına qazı aşağı təzyiqlə, ya fasilələrlə verib, amma deyib Gürcüstan anbarlarında ehtiyat əskik olmasın. Hətta bun görə illərdir Azərbaycan hökuməti tənə-tənqidlərə də məruz qalır. Ay Gürcüstandakı kilsələrə qaz verilir, daha nələr, deyə... Gürcüstan Azərbaycan pulları ilə cənnətə dönür. Bütün bunların əvəzində Xocalı canisinə abidə qoymaq...

Heç kim bu məsələdən Gürcüstan hökumətinin xəbərsiz olduğu iddiasını beyinlərə yeritməyə çalışmasın. Ölkə ərazisində baş verənlərə, atılan hər bir addıma görə birinci hökumət məsuliyyət daşıyır. Hər halda söhbət Abxaziya, ya Şimali Osetiyada qoyulan abidədən getmir. Başa düşürük. Axalkalaki ermənilərin oylağıdır, amma hələ ki, orada Gürcüstan qanunları hökm sürür. Bu gedişlə davam etsə, Tiflis ermənilərin qarşısından geri çəkilsə, bir gün bu ərazilərə də uzaqdan baxa bilər, yenə də öz problemidir.

Biz indiyədək Gürcüstandan hansısa erməni cəlladının tutulub Bakıya təhvil verilməsini nə gördük, nə də eşitdik - baxmayaraq ki, hər zaman deyirlər biz sizi yaxşı anlayırıq, çünki özümüz də 20 faiz torpaq itirmişik. Bunun əvəzində... Tiflis 5 ildir Qarabağ Azadlıq Təşkilatının sədri Akif Nağının, “Borçalı” Cəmiyyətinin rəhbəri Zəlimxan Məmmədli, müavini Salman Murğuzovun ölkəyə girişini yasaqlayıb.

2018-ci ildə Gürcüstan iqtisadiyyatına 1 milyard 888,8 mln. dollar xarici investisiya yatırılıb, bunun 465 milyonu (24,6 faizi) Azərbaycanın payına düşüb. Azərbaycan Gürcüstan iqtisadiyyatına investisiya qoyan xarici ölkələr sırasında birinci yerdədir! Hətta Türkiyə siyahıda üçüncüdür. Tiflisin “sağ ol”udurmu?

Başqa misal: 2018-ci ildə Azərbaycandan Gürcüstana 1 424 610 nəfər gedib. Bununla azərbaycanlılar 2017-ci ildəki kimi, ötən il də Gürcüstana səfər edən turistlərə liderlik edib! O boyda Rusiya bizdən sonradır. Hər gedən turist Gürcüstana nə qədər xərcləyib? Turizmdən əldə etdiyi qazancın böyük hissəsi bizim payımıza düşür. Gürcü hökuməti utanırmı?!

Gürcüstanda bu illər ərzində çox hökumətlər dəyişib, amma hər gələn Azərbaycana qarşı məkrli davranıb. Gah Qarsa dəmir yolu çəkiləndə Axalkalakidə erməniləri qızışdırdılar, gah dedilər qazı Rusiyadan alacağıq, gah Ermənistana dəmiryolu xəttinin açılacağını bəyan etdilər - hansı dəmiryolu ki, işğal olunmuş Gürcüstan ərazilərindən keçir. Kim bilir, bəlkə də həmin xəttin bərpası üçün tələb olunan 250 milyon Ermənistanda olsa, bunu da reallaşdırardılar.

Gürcüstan bizim qapımızdır, bəli. Amma bu kommunikasiya, bu qapıya görə milyardlar qazanır. Odur ki, sonuncu fakt baş verməməliydi. Normal ölkə soyqırım törədənə abidə qoymaz, abidə soyqırıma ucaldılır. Kəsəsi, qonşumuzu bir daha tanıdıq. Heç olmasa, bundan sonra bizə millət və dövlət olaraq - həm də Gürcüstandakı soydaşlarımız üçün - dərs olsun! O qışdan bir də olacaq...
________________________________________________________________________________________________________________










SON XƏBƏRLƏR
Bu gün Bəxtiyar Vahabzadənin doğum günüdür - VİDEO
Azərbaycançılıq ideologiyası haqqında film çəkildi
Gürcüstanın Azərbaycana 7.3 milyon dollar borcu var
"Neftçi"nin baş məşqçisi məğlubiyyətdə özünü günahlandırıb
Sosial internet şəbəkələri saxta “qədim erməni dövlətçiliyi” barədə yalanlarla doludur
Vikimaniya beynəlxalq konfransında ölkəmizi üç vikipediyaçı təmsil edəcək
ABŞ Ermənistanın iki şirkətinə sanksiya tətbiq edib
“Baş nazir dəqiq deyib, nəsə əlavə etməyə ehtiyac yoxdur...” - Mnatsakanyan
Azərbaycan və İran prezidentlərinin telefon danışğındakı pərdəarxası MƏQAMLAR
Təslim olmuş erməni hərbçisi ilə bağlı danışıqlar aparılır
Tehran metrosunda hicabına riayət etməyən qadınlara qarşı təzyiqlər şiddətləndirilir
Qəzaya uğramış təyyarəmiz parça-parça olub
Aqil ABBAS: "Qurban Qurbanov, səninləyik!"
Mnatsakanyan Məmmədyarovla danışıqların detallarını açıqladı
Toyu olacaqdı, özünü asdı
Urmiya gölünün qurumasını önləyən İLGİNC PLAN: Türkiyədən…
Ağ dəvə düzdə qaldı - II HİSSƏ
Azərbaycan istehsalı olan "Tufan" gəmisinin nümayişi olub
"Bunu etsək, Paşinyan bir də qələt edib, "Qarabağ Ermənistandı" deməyəcək..."
Azərbaycanlı general ABŞ donanmasında komandan təyin olundu
Məşhur “Adidas” şirkəti “Traxtur”a sponsor oldu
ABŞ Asiyada yeni raketlər yerləşdirəcək
Rusiya, Azərbaycan və İran yeni enerji layihəsinin icrasına dair saziş imzalayıb
Qırğızıstan: keçmiş prezident Almazbek Atambayev qətldə ittiham olunur
“Yeni Gundem” saytı 2 yaşında
Bölgələrə yağış yağacaq, dolu düşəcək – Sabahın HAVASI
Bu şəxslərə 50 avtomobil hədiyyə edildi – PREZİDENTİN TAPŞIRIĞI İLƏ
Xocalı soyqırımına həsr olunan filmin çəkilişi başa çatır
Ali məktəblərə boş qalan yerlərin sayı açıqlandı
Türkiyə və ABŞ arasında tarixi anlaşma – Detallar