Qarabag Media
Haqqımızda Əlaqə

İranın Qarabağ məsələsinə yanaşması dəyişir?


Tarix:19-01-2019, 01:21 Kateqoriya:Manşet / Siyasət

İranın Qarabağ məsələsinə yanaşması dəyişir?

Ekspertlərin fikrincə, Tehranın Azərbaycana dəstəyi, Ermənistana isə təzyiqi artırmaq istədiyi hiss olunur.

Azərbaycan yerləşdiyi regionda Ermənistan istisna olmaqla, bütün dövlətlərlə mehriban qonşuluq siyasətini həyata keçirir. Ermənistanın isə bu ölkələr sırasına daxil ola bilməməsi Azərbaycan torpaqlarını işğal etməsi səbəbi ilə bağlıdır. Məhz bu səbəbdən ötən illər ərzində Azərbaycan öz ərazi bütövlüyünü təmin etmək üçün Ermənistana qarşı təcridetmə siyasəti həyata keçirib.

Aparılan uğurlu siyasətin nəticəsi olaraq, Türkiyə tamamilə Ermənistanla siyasi, diplomatik, iqtisadi əlaqələrini dayandırıb və sərhədlərini bağlayıb. Rəsmi Ankara dəfələrlə vurğulayıb ki, Qarabağ Azərbaycana məxsusdur və işğal edilmiş ərazilər azad olunmayınca, Ermənistanla əlaqələr bərpa edilməyəcək. Təbii ki, Azərbaycan bu mövqeyi digər qonşu dövlətlərdən də gözləyir. Elə bu məqsədlə də rəsmi Bakı Rusiya, İran və Gürcüstanla əlaqələrini genişləndirir. Son bir il ərzində İran rəsmilərinin Azərbaycana səfərləri də bu baxımdan diqqəti cəlb edir. Bu günlərdə İranın Silahlı Qüvvələrinin Baş Qərargah rəisi Məhəmməd Baqeri Bakıda səfərdə oldu və Azərbaycan prezidenti İlham Əliyevlə görüşdü. Bu görüş zamanı İran ordusunun baş qərargah rəisi bildirdi ki, İran Qarabağ torpaqlarını Azərbaycan torpaqları hesab edir, Azərbaycanın ərazi bütövlüyünü dəstəkləyir və bundan sonra da dəstəkləyəcək, sərhədlərin zor gücü ilə dəyişdirilməsi qəbuledilməzdir, İran bu məsələdə hər zaman Azərbaycanın yanındadır.

Maraqlı məqam ondan ibarətdir ki, indiyədək heç bir İran rəsmisi belə qəti mövqe sərgiləməyib. Görəsən, İran Qarabağ məsələsində mövqeyini dəyişirmi?


İranın Qarabağ məsələsinə yanaşması dəyişir? Mövzu ilə bağlı "Kaspi” qəzetinə açıqlamasında Böyük Quruluş Partiyasının sədri, millət vəkili Fazil Mustafa bildirdi ki, İran hər zaman Dağlıq Qarabağ məsələsinin sülh yolu ilə həllinə tərəfdar olduğunu bildirərək Azərbaycanın ərazi bütövlüyünü dəstəkləyib: "Onlar tərəfindən yanlış bəyanatlar verilmirdi. Sadəcə olaraq, İranın Ermənistanla siyasi-iqtisadi əlaqələrinin genişlənməsinə Azərbaycandan müəyyən iradlar səslənib. Amma hər halda Bakıda səfərdə olan İran Silahlı Qüvvələrinin Baş Qərargah rəisinin açıqlamasının özü də İranın mövqeyində bir dəyişiklik olmadığını göstərir, yeni bir mövqedən söhbət getmir. Əslində İranın bu mövqedə olması bizim üçün qaneedicidir.

Onu da qeyd edim ki, Ermənistanın yeni hakimiyyəti bəyan etdi ki, əgər Amerikanın İranla problemi yaranarsa və ya BMT-nin qərarı olarsa, rəsmi Yerevan bu ölkə ilə sərhədlərini bağlaya bilər. Lakin Azərbaycan tərəfindən belə bir açıqlama verilmədi. Ermənistanın bu addımı növbəti dəfə öz müttəfiqlik andına xəyanətinin bir nümunəsi idi. İran da yəqin ki, bu məsələni ciddiyə alacaq və düşünəcək ki, belə bir məsələ varsa, deməli problemə daha fərqli şəkildə yanaşılmalıdır. Ona görə də mümkündür ki, bu, İranın Azərbaycanla münasibətlərinə müsbət təsir göstərsin”.
F.Mustafa əlavə etdi ki, İran gələcəkdə Azərbaycanın Ermənistana qarşı tətbiq etdiyi təcridetmə siyasətinə dəstək verə bilər: "Çünki siyasətdə daimi mövqelər yoxdur. Elə məsələlər ola bilər ki, İran belə bir addım atsın. İranda da bunu istəyən kifayət qədər qüvvələr var. Sadəcə olaraq, mövcud qüvvələrin içində hələ də yanlış bir düşüncə qalır ki, İran Azərbaycanla Ermənistan arasında bərabər məsafə qoymalıdır. Amma bir az dərindən strateji düşüncə olsa, məncə, bu məsələdə Azərbaycanla daha çox yaxınlaşmanı hiss edəcəyik. Onda Azərbaycanın da İranla münasibətlərində xeyli müsbət çalarlar ortaya çıxacaq”.


İranın Qarabağ məsələsinə yanaşması dəyişir? "Atlas” Araşdırmalar Mərkəzinin rəhbəri, politoloq Elxan Şahinoğlu bildirdi ki, İran-Azərbaycan əlaqələri indiki qədər intensiv olmayıb: "Məsələn, son illər ərzində prezidentlər səviyyəsində 10-dan çox görüş keçirilib. Bu il ərzində Azərbaycan, İran və Rusiya prezidentlərinin üçtərəfli zirvə görüşü də nəzərdə tutulub.

Onu da qeyd edim ki, İran ordusunun baş qərargah rəisi Məhəmməd Baqerinin Bakıya səfəri zamanı dediyi "İran Qarabağ torpaqlarını Azərbaycan torpaqları hesab edir” sözləri maraqlı məqamlardan xəbər verir. İran rəsmilər əvvəllər də bir neçə dəfə Azərbaycan torpaqlarının işğal altında olduğunu vurğulamışdılar. Ancaq Məhəmməd Baqeri bu dəfə Qarabağla bağlı açıqlamanı elə dedi ki, sanki Tehran Qarabağ məsələsində Azərbaycana dəstəyi artırmağa hazırdır. Digər tərəfdən, İran ordusunun baş qərargah rəisi Qarabağla bağlı açıqlamanı xüsusi vurğulamaq üçün Bakıda televiziya jurnalistləri üçün qısa brifinq keçirdi. Yəni, sanki Məhəmməd Baqeri istəyirdi ki, onun Qarabağla bağlı açıqlamasını hamı eşitsin”.
Politoloq vurğuladı ki, Məhəmməd Baqeri əslən azərbaycanlıdır və İran hakimiyyətində və dini dairələrində azərbaycanlıların sayı az deyil: "Əlbəttə, bu azərbaycanlıların bir qismi İranın milli və təhlükəsizlik maraqlarından çıxış edirlər. Həmin azərbaycanlılar İranın Ermənistanla əlaqələrinə də xoş baxmaya bilər. Mümkündür ki, Məhəmməd Baqeri bir azərbaycanlı olaraq Dağlıq Qarabağ məsələsində Azərbaycana qətiyyətli dəstəyi Bakıda vurğulamağı lazım bilib.

Digər tərəfdən, Baqerinin açıqlaması Tehranın düşünülmüş siyasəti də ola bilər. Moskva kimi Tehran da Ermənistanın yeni baş naziri Nikol Paşinyanın xarici siyasətindən narazı ola bilər. Ermənistan hakimiyyətindəki "Qarabağ klanı” 20 il həm Moskvanı, həm də Tehranı qane edirdi. Çünki "Qarabağ klanı” Moskva ilə Tehranın oyun qaydalarını qəbul etmişdi. Paşinyan isə "Qarabağ klanı”nın cızdığı oyun qaydalarını qəbul etmir. Ona görə də Tehran Paşinyana ehtiyatla yanaşır. Mümkündür ki, Tehran Azərbaycana dəstəyini bir qədər artırmaqla Paşinyana təzyiq etmiş olsun. Bu halda Məhəmməd Baqerininin açıqlaması Tehranın Paşinyana təzyiq vasitəsinin tərkib hissəsidir”.

E.Şahinoğlu əlavə etdi ki, İran ordusunun baş qərargah rəisinin Azərbaycana səfərinin başqa bir səbəbi də ola bilər: "Ümumiyyətlə, son bir il ərzində İrandan Azərbaycana gələn yüksək rütbəli hərbçilərin sayı artıb. Görünür, Tehran bu yolla əmin olmaq istəyir ki, Azərbaycan ABŞ-ın İrana qarşı sanksiyalarında yer almayacaq və rəsmi Bakı da hər dəfə bunu bəyan edir. Ancaq bu açıqlamalar heç də həmişə İran rəsmilərini və hərbçilərini rahatlandırmır. Ona görə də onlar hər dəfə Bakıya gəlir və eyni açıqlamaları Azərbaycan rəsmilərinin dilindən eşitmək istəyirlər.
Məhəmməd Baqeri də bunun qarşılığında Qarabağ məsələsində Azərbaycana birmənalı dəstək verdiklərini söylədi. Ancaq Azərbaycan üçün bu azdır. Azərbaycanın Tehrandan gözləntisi budur ki, İran Qarabağ məsələsində Türkiyə kimi mövqe tutsun, Azərbaycan torpaqları işğaldan azad olunmayana qədər Ermənistanla diplomatik əlaqələri kəssin, sərhədi qapatsın. İran belə bir addım atarsa, bu, Nikol Paşinyanın Qarabağ siyasətini ciddi korrektəyə məcbur edə bilər”.

__________________________________________________________________________________________________________________










SON XƏBƏRLƏR
İlbər Ortaylı: “Sultan Səlimlə Şah İsmayıl kimi dava edəsi deyilik”
Mayın 29-da Putin və Paşinyan arasında görüş keçiriləcək
Ərdoğandan çağırış: "Seçki mübahisələrini geridə qoyaq"
"Azərbaycan(!) qızının gecə klubunda nə iti azıb ki?.." - Fikir savaşı
Azərbaycan və İranın birgə istehsalı olan avtobuslar satışa hazırlanır
Xəzərdə 6 milyard dollarlıq yeni layihəyə start verildi
Koçaryan Avropa liderlərini köməyinə çağırdı
Əhaliyə hava xəbərdarlığı
Azərbaycan dilinin 113 minlik yeni orfoqrafiya lüğəti hazırlanıb
"Qaz və işığa qoyulan limitin ləğvi məqsədəuyğun deyil" – Deputat
Azərbaycanda zorakılığa məruz qalan uşaqlarla bağlı qaynar xətt yaradılır
Pensiya və əmək haqları yenidən qaldırılacaq – Prezident bəyan etdi
Aqil ABBAS: TELEKANALLARI TELEKANALİZASİYAYA ÇEVİRMƏYİN
"Paşinyan Dağlıq Qarabağda rəngli inqilab etmək istəyir" - NƏZAKƏT MƏMMƏDOVA
Şərif Ağayar: "Laçın indi mənə çatmadığım, çata bilmədiyim bütün arzuların ümumiləşmiş obrazı kimi görünür" - MÜSAHİBƏ
İslam dininə üçlü yanaşma: Mühafizəkarlıq, Dünyəvilik, Millilik - (III yazı)
Prezident və birinci xanım Neftçilər parkının açılışında
Güclü külək və leysan yağışları Gürcüstanda ciddi fəsadlar törətdi
Müasir Azərbaycan Folklorşünaslıqda yeni nəzəri-metodoloji yanaşma təcrübəsi
Bakının şərtinə əməl olunmadıqca, eskalasiya təhlükəsi davam edəcək
"Türk axını"nın Serbiya ərazisində tikintisinə start verildi
Qətlə yetirilən nazir, azad edilən qatil
Əkrəm İmamoğlunun qələbəsi tanındı – SON DƏQİQƏ
Türk deputat İrəvanda erməniləri susdurdu: "Qarabağ Azərbaycanındır"
Mahir Abbaszadə seçiciləri ilə görüşdü - FOTOLAR
Şəki Məhkəməsinə iftira atanlar kimlərdir? - ŞİKAYƏT
AKP rəsmən İstanbulda təkrar seçki tələb edir
Rövşən Rzayev BMT nümayəndəsi ilə görüşdü
Lavrov Azərbaycan və Ermənistan XİN rəhbərlərinin razılaşmasından DANIŞDI
"Belə hoqqabazlarla danışıq yolu ilə Qarabağı azad etmək mümkündürmü?"