Qarabag Media
Haqqımızda Əlaqə

Vətənə dönməyim gəlir, vətəndə ölməyim gəlir


Tarix:5-06-2018, 13:35 Kateqoriya:Manşet / Qarabağ

Vətənə dönməyim gəlir, vətəndə ölməyim gəlir

Yaşadığım binanın həyətində kiçicik bir bağça var. Binanın sakinləri bu bağçanı çox sevirlər. Hər kəs imkan tapan kimi bağçadakı ağacları sulayır, onların dibini belləyir, torpağı alaq otlarından təmizləyirdi.

Mən hər gün işə gedərkən yolum bu bağçanın yanından düşürdü. İstər-istəməz boylanıb ağaclara, çiçəklərə baxırdım. Son zamanlar burada işləyən, ağaclara böyük bir həvəslə qulluq edən bir qoca görürdüm. Ağır-ağır hərəkət etməsindən qocanın çox yaşlı olduğu hiss olunurdu. Əvvəllər bu qocanı buralarda görməmişdim. Fikirləşdim ki, yəqin bizim binaya təzə köçübdür.

Bir dəfə işdən qayıdanda qəribə bir hadisənin şahidi oldum. Qoca ovcunda tutduğu nəm torpağı acgözlüklə qoxlayırdı. Onun bu hərəkəti diqqətimi cəlb etdiyindən bir az da ona yaxınlaşdım. İndi onun üzünü aydın görürdüm. Qocanın gözlərindən sel kimi yaş axırdı. Mən qocaların və uşaqların göz yaşlarına heç vaxt biganə qala bilmirəm. Qocanın göz yaşları məni də kövrəltmişdi. Ona yaxınlaşdım. Məni görəndə göz yaşlarını gizlətməyə çalışdı. Hiss etdim ki, ürəyi doludur. Dərdini bölüşməyə adam axtarır.

Qocanın qoluna girib onun bağçanın içərisində qoyulmuş skamyada oturmasına yardım etdim. Ovcundakı torpağı hələ də yerə tökməmişdi. Əksinə, ovcunu daha bərk-bərk sıxmışdı. Nədənsə, ötən il böyük maraqla oxuduğum Varisin "Bir ovuc torpaq" əsəri həmin an yadıma düşdü. Gözlərimi qocanın üzünə dikib sakitcə oturmuşdum. Onun nə vaxt söhbətə başlayacağını səbirsizliklə gözləyirdim. Qocanın isə xəyalı çox uzaqlarda idi. O, bir də diqqətlə ovcundakı torpağa baxıb ağır-ağır sözə başladı:

- Eh, qızım, taleyimizdə bunları yaşamaq da var imiş demək. Bilirsən, mən o biri məhlədə yaşayıram. Xeyli vaxtdır meylimi bu ağaclara salmışam. Başımı qatıram. Torpağın qoxusu mənə doğma yurdumu xatırladır. Mən də öz vətənində "vətənsiz" yaşayanlardanam. Köçkünəm! Sonuncu kəlməni dərin təəssüf hissi ilə dedi. Qoca başını ağır-ağır tərpədərək, dərin təəssüf hissi ilə söhbətini davam etdirdi:

- Hələ uşaq olanda anamdan tez-tez bu sözləri eşidirdim: "Allah heç düşmənimi də öz vətənindən ayrı salmasın". O zaman bu sözlərə o qədər də əhəmiyyət vermirdim. Ancaq böyüyüb yaşa dolduqca vətənin nə demək olduğunu başa düşdüm.

Mən uşaqlığımı və gəncliyimi Qarabağın gözəl guşələrindən olan Şuşa şəhərində keçirmişəm. Gözəl Şuşa, nazlı gəlin, qədim məkan! Mənim sevgili vətənim! Səni məndən ayırdılar, məni də öz qəlbimdən ayırdılar. Boğuluram, qızım, mən bu şəhərdə boğuluram. Əvvəllər elə bilirdim Şuşadan ayrı heç bir gün də yaşaya bilmərəm. Ancaq bax, neçə illərdir ki, ölməmişəm, yaşayıram. Ancaq məni yaşadan yalnız və yalnız vətənə bir də dönmək ümidi olub. Bu inamımı heç vaxt itirməmişəm.

Qoca danışdıqca gözlərində zəif bir ümid qığılcımı yanıb sönürdü.

Sonra birdən diqqətlə gözlərimə baxıb soruşdu:

-Sən bizim o yerləri heç görmüşdünmü, qızım?

-Bəli, babacan, görmüşdüm də, gəzmişdim də, sevmişdim də o yerləri. Qarabağlı olmasam da, uşaqlığım o gözəl yerlərdə keçib. Mən də sizin qədər yanıram, sizin qədər təəssüf hissi keçirirəm. Gecələr yuxularımda görürəm Cıdır düzünü, İsa bulağını, Xan qızının narazı çöhrəsini, Vaqifin, Zakirin, Bülbülün, Üzeyirin narahat ruhlarını.

Qocanın gözləri yenə doldu:

-Eh qızım, yuxulardan danışma. Mən hər gecə o yerləri gəzib qayıdıram. Deyirlər, yuxular rəngli olmur. Ancaq mən o güllərin, çiçəklərin hər birini öz rəngində görürəm. Hətta ətirlərini belə hiss edirəm. Bizim o yerlərin çiçəklərinin, otlarının ətri bir özgə cür olardı. Oranın təmiz havasını ciyərlərinə çəkməyin ləzzətini heç nə verə bilməz. Daha dözə bilmirəm, qızım, dözə bilmirəm. Elimi, obamı, ata-anamın dəfn olunduğu doğma torpağımı istəyirəm. Burnumun ucu göynəyir o yerlərdən ötrü. Amma ümidimi itirməmişəm. Son vaxtlar ümidim bir az da artıb. Prezidentimizin yürütdüyü düzgün siyasət mənim ümidimin artmasına səbəb olub. Mənə elə gəlir ki, doğma yurduma dönəcəyim gün çox da uzaqda deyil. Mən qələbə gününün yaxınlaşdığını hiss edirəm.

Qoca bu sözləri söyləyib ovcunda saxladığı torpağı bir daha qoxlayıb ehtiyatla yerə tökdü. Yavaş-yavaş yerindən qalxıb mənimlə vidalaşdı. Uzaqlaşan zaman bu sözləri pıçıltı ilə söylədiyini eşitdim:

"Vətənə dönməyim gəlir, vətəndə ölməyim gəlir".

İlhamə HƏSƏNOVA










SON XƏBƏRLƏR
Qənirə Paşayeva Murad Köhnəqalanın azadlığa buraxılmasına vasitəçi oldu
Milli Qurtuluş Günü münasibəti ilə Kürdəxanıda məcburi köçkünlər üçün tibbi aksiya keçirilib
Kərəm Məmmədli kafedra müdiri təyin edildi
Rövşən Rzayev BMT İnkişaf Proqramının nümayəndəsi ilə görüşüb
Meral Akşenerdən Elçibəy ailəsinə başsağlığı
Gestapoda sovetlərin adamı – həqiqi Ştirlits olubmu? -Məxfi sənədlər(FOTOLAR)
Azərbaycanda Qurtuluş günü qeyd olunur
Azərbaycan XİN Ermənistan XİN-in bəyanatına cavab verib
Elçibəyin həyat yoldaşının dəfn ediləcəyi yer açıqlandı
Bakıda ana və qızı özlərini 10-cu mərtəbədən atdı - Hər ikisi öldü
Fərizənin anası vəfat edib
Qazaxıstandakı mitinqlərin səbəbi budur - Tokayev
Qarabağ əlillərinə 50 avtomobil verildi
Məmməd Əmin Rəsulzadənin və Nuru Paşanın şəkilləri Avronun üzərinə vuruldu
Azərbaycandan Batumiyə birbaşa aviareys açıldı
TÜRKPA-nın baş katibindən Azərbaycan haqqında önəmli bəyanat
Oqtay Əsədov: “100 nəfər oturub 78 nəfər səs verir, bu nə deməkdir?”
Çavuşoğlu: "NATO Türkiyəni müdafiə edə bilmir, ona görə Rusiyadan S-400 alırıq"
Elçibəyin həyat yoldaşı vəfat etdi
Azərbaycanda 5 km 100 m uzunluqda Dövlət Bayra­ğı hazırlandı
İdlibdə Türkiyə ordusunun mövqelərinə 34 raket atıldı –Rəsmi Ankara Rusiya və İrana səsləndi
Ermənilər "Məşədi rəqsi"ni də OĞURLADILAR – VİDEO
Rəşad Mahmudov təcili yardım həkimlərinin döyülməsindən danışdı – TƏKLİF
"Yol hərəkəti haqqında" qanuna dəyişiklik edildi
Ermənilərin aviasiya vasitələrimizi vurmaq cəhdi uğursuz olub - VİDEO
Ermənistan Qarabağa turist cəlb edə bilmir - FAKTLAR
Dövlət Komitəsinin sədri və sədr müavinləri bölgələrdə vətəndaşları qəbul ediblər
Elmar Məmmədyarov: "Ermənistan rəhbərliyinin məsuliyyətsiz davranışı danışıqlar prosesinə xələl gətirir"
Ukrayna ordusu Donetskin 100 metrliyində
Doğum günün mübarək olsun, ŞƏHİD!