Qarabag Media
Haqqımızda Əlaqə

Xoşbəxtəm ki, şaxtadan donan o əllərdən öpmüşəm...


Tarix:5-12-2017, 00:25 Kateqoriya:Manşet / Yazarlar

Xoşbəxtəm ki, şaxtadan donan o əllərdən öpmüşəm...

HÖRMƏTLİ MÜƏLLİMİMİZİN RUHUNA HÖRMƏTLƏ...

Bəzən həyatımızda elə insanlar olur ki, gerçəkdə bizim müəllimimiz olmasa da, dərs dediyi auditoriyada oturmamış olsaq belə, ondan o qədər gözəl örnəklər götürür, elə dərslər öyrənirik ki, onu həyatımız boyu öz müəllimimiz hesab edirik. Hətta özü həyatda olmasa belə...Əlbəttə çox az olur belə insanlar, amma olur... Bu gün sizə belə bir insandan söhbət açmaq istəyirəm. Mənim özümə müəllim hesab etdiyim bir insandan - görkəmli tərcüməçi, dilçi alim, f.e.n.dos., antisovet "İLDIRIM" təşkilatının qurucularından biri- İSMİXAN RƏHİMOVDAN...

İsmixan müəllimi təsvir etməyə sözlər yetmir bəzən... Mənim aləmimdə onun şəxsiyyətinin böyüklüyünü heç bir ifadəylə izah etmək olmur. Görkəmdə kiçik, şəxsiyyətdə böyük insan idi İsmixan müəllim.

İsmixan Məmməd oğlu Rəhimov 1925-ci il sentyabr ayının 18-də Bakı şəhərində tacir ailəsində anadan olmuşdu. Atası Şahverdiyev Əlibəndə tacirliklə məşqul imiş. Anasi Rəhimova Gövhər mülkədar ailəsində göz açmış və ailənin yeganə qızı olmuşdur. İsmixan müəllim 1931-ci ildə Bakı şəhərində orta məktəbə daxil olmuşdur. 1937-ci ildə, onun 12 yaşı olarkan atası işğalçı rejim tərəfindən həbs edilmiş və bir daha geri dönməmişdir. Anasını da erkən itirən İsmixan Rəhimov məktəbi vaxtından bir il tez və yüksək qiymətlərlə bitirərək 1941-ci ildə Xarici dillər institutuna qəbul olmuş və o vaxt müharibə ilə əlaqədar Peterburq şəhərindən Bakıya köçürülmüş Xarici Dillər İnstitutunun müəllim heyətindən dərs almışdır. 1943-cü ildə təhsilini fərqlənmə diplomu ilə bitirmiş, daha sonra Azərbaycan Dövlət Universitetinin filologiya fakultəsinə qəbul olmuş və burada təhsil alarkən Azərbaycan Tibb İnstitutuna qəbul olmuşdur. Aspiranturaya qəbul edilməsi ilə əlaqədar tibbi təhsilini dayandırmışdır. Lakin 1948-ci ildə Sovet rejimi tərəfindən həbs edilən İsmixan Rəhimov Azərbaycan Dövlət Universitetindəki təhsilini sona çatdıra bilməmişdir.

SÜRGÜNƏ APARAN YOL...

1944- cü ildə İsmixan Rəhimov və ayrı-ayrı ali məktəblərdən olan daha 6 nəfər tələbə «İldırım» gənclər təşkilatını yaradırlar. Məqsəd Azərbaycanın müstəqilliyi və Azərbaycan dilinin sıradan çıxmasına qarşı mübarizə aparmaq olur. Bir gün onlarIn xalq şairi Səməd Vurğuna kömək istəmək məqsədilə "Dönməzlər" imzası ilə göndərdikləri məktub təhlükəsizlik orqanlarının əlinə düşür. Bütün ali məktəblərdə imla yazdırılıqdan sonra məlum olur ki, məktubu yazanın xətti İsmixan Rəhimovun xəttinin eynidir. Beləliklə, o, 6 nəfər gənc həmkarı ilə "İldırım" adlı antisovet millətçi gənclər təşkilatı yaratdığına görə mühakimə edilir. İsmixan Rəhimov 25 il azadlıq, 5 il seçki hüququndan məhrum edilir, və bütün əmlakı müsadirə olunur. İsmixan Rəhimov haqqında məhkəmənin çıxardığı hökmdə deyilirdi: "İsmixan Rəhimov antisovet təşkilatın 1944- cü ilin əvvəlindən sistematik yığıncaqlarını təşkil edib,həmin yığıncaqlarda aktiv iştirak edərək Sovet dövlətinə və ÜİK(b)P siyasətinə qarşı çıxmış, sovet hökümətinin milli siyasətini pisləmiş, "İldırım" adlı antisovet təşkilatına sadiq qalacaqlarına and içmiş, antisovet təşkilatının nizamnamə və mərəmnaməsini tərtib etməyi öz öhdəsinə almış, gizli mətbəə və gizli şirift düzəltməyə çalışmış, Abdullayev Gülhüseyn ilə birlikdə Azərbaycanın görkəmli şairlərindən birinə (Səməd Vurğun) antisovet və millətçi məzmunlu məktub göndərmişdir. Rəhimovun əsas məqsədi Sovet Azərbaycanını SSRİ- dən ayırmaq və Azərbaycanda "Burjua millətçi respublika" yaratmaq olmuşdur".

Mərhum professor Həbib Babayev deyirdi: "O zaman biz tələbə idik. Bu hadisə bizi həyacanlandırır, narahat edirdi. Qəlbimizi vətən məhəbbəti, qeyrət, təəssüb hissi ilə dolduran bu vətənpərvər gəncləri mühakimə edib qolları buxovlu halda məhkəmə binasından çıxarıb dustaq maşınına mindirdilər. İsmixan Rəhimov oraya toplaşanlara üz tutub dedi "Darıxmayın, biz gedirik, tezliklə qayıdacayıq ". Və beləcə,1937- ci ildə atasının göndərildiyi gedər-gəlməzə 1948-ci ildə İsmixan müəllim də sürgün olunur. Məşəqqətli sürgün həyatında ölüm-dirim mübarizəsi aparan İsmixan müəllim hətta o əzabları anlatdıqca onun gözlərindəki, içindəki Azərbaycan eşqinə aşiq olmuşdum mən. Və nəhayət, Stalin öləndə bir çox məsələlər kimi bu işə də yenidən baxmağa qərar verilir və 1955-ci ilin mayında "İLDIRIM"çılar evlərinə qayıdırlar.

Bəli, İsmixan Rəhimov belə bir şəxsiyyət idi...

İsmixan müəllim deyirdi ki, “İnsan bir qadını sevəndə xoşhal olur, valideynlərini sevəndə sevinir, çünki borcunu verir. Vətənini sevən insan isə qürurlu olur”. Yəqin elə bu səbəbdən də ömrünün 7 ilini sürgündə, ölüm düşərgəsində keçirsə də, İsmixan müəllim sürgünə yollananda yaşadığı anların ən gözəl anlar, keçirdiyi hisslərin ən müqəddəs hisslər olduğunu deyirdi. İsmixan müəllim başdan ayağa qürur nümunəsi idi. Ömrünün 7 ilini ölüm düşərgəsində keçirən İsmixan Rəhimovun şərəfli ömrünə 50 il müəllimlik etmək yazılmışdı, amma gerçək müəllimlik... Dərs dediyi, dil öyrətdiyi insanlara tək ingilis dili deyil, ilk növbədə şərəf, ləyaqət dərsi öyrədirdi İsmixan müəllim. Bir gözəl xasiyyəti də vardı. İngilis dilindən hazırlığa tələbələri qəbul edərkən (son illər evində dərs verirdi) kiçik müsahibə, sorğu-sual edirdi, amma ingilis dilindən deyil. Bir dəfə soruşdum ki, müəllim, niyə ingilis dilindən hazırlığa gələn adama siz ingilis dilindən deyil, Nizamidən, Fizulidən, Üzeyir Hacıbəyovdan, Qara Qarayevdən, onların əsərlərindən, tarixdən, azadlıqdan, Azərbaycan Respublikasının yaradılmasından, və s. suallar verirsiniz? Cavab verdi ki, özünü tanımayan, bilməyən biri lap bütün dillərdə danışsa nəyə faydası olar ki... Belə bir müəllim idi İsmixan müəllim... İsmixan müəllim kimlərə dərs verməmişdi ki. Azərbaycanın indiki dövlət başçısı İlham Əliyevə, onun bacısı Sevil Əliyevaya, onlarla nazirə, nazir övladlarına, neçə-neçə məşhur sənətkarlara ingiliscə danışmağı o öyrədib. Heydər Əliyev şəxsən valideyn kimi ona öz minnətdarlığını bildirmişdi.

Mənsə... Mən çox xoşbəxtəm bu anlamda ki, o böyük şəxsiyyətlə ünsiyyətdə olmuşam, əllərimlə o gözəl və böyük insana çay vermişəm və Sibirin Tayşet və Bodaybo meşələrində ağac kəsməyə məhkum olaraq şaxtadan donan o əllərdən öpmüşəm...

İndisə... İndi İsmixan müəllim bu dünyada yoxdur. Ondan geriyə qalansa, əməlləri, minlərlə tələbəsi, elmi məqalə və kitabları, qəlbimizdə daim yaşayan xoş xatirələri, üç oğlu, nəvələri və bir də onu daim böyük məhəbbətlə sevən ömür-gün yoldaşı Zərifə xanım var...
RUHU ŞAD OLSUN BÖYÜK ŞƏXSİYYƏTİN!!!

Xatirə Laçın










SON XƏBƏRLƏR
İbrahim Tatlısəsi azərbaycanlı həkim sağaltdı
İraq Kərkükdən yenidən neft ixracına başladı
"Azərbaycan televiziyalarından bütün şou verilişlərini yığışdırardım" — Xeyrəddin Qoca
Azərbaycana qayıdan sabiq nazir yenidən xəstəxanaya yatırıldı
Gələn il pensiyalar 35% artacaq - Nazirdən açıqlama
Belçikada insan cəsədindən gübrə kimi istifadə ediləcək
Gələcək rektora müraciət
Deputat Mahir Abbaszadə yüksək vəzifəyə təyin olundu
"Müalicəmi bitirib Bakıya qayıdacağam" — Rasim Balayev
“Özünü pis kişi eləmə...” - “Qoy başına kül qoysunlar...”
Bakıda güclü yanğın: Alov məktəb və yataqxananı ağuşuna alıb
"Azərbaycanda əməkhaqları digər ölkələrlə müqayisədə çox aşağıdır" — Ziyad Səmədzadə
"Məndən küsüb, inciməyə nə var ki..." — Nizami Abbasovun şeirləri
Flora Kərimova nazirin yerində oturmasından danışdı: “Heç kimə heç nəyi keçməyəcəyəm”
Sənədləri qaydasında olan 114 şəhidin 146 vərəsəsinə birdəfəlik ödəniş edilib
Ərdoğan ABŞ-ın 3 PKK liderinin başına mükafat qoymasını “oyun” adlandırdı
Ukraynada polis rəisi olan azərbaycanlı xanım
Seçkilər heç nəyi dəyişməyəcək - Hədəf yenə Yaxın Şərq və İrandır
Yerli sakinlər və məcburi köçkünlər Bakı “Lift-təmir” İB rəhbərliyinə MİNNƏTDARLIQ ETDİ
Klinton yenidən prezidentliyə namizədliyini irəli sürmək istəyir
Türkiyədən bayraq gününə dəstək - FOTO
Mustafa Kamal Atatürkün ölümündən 80 il ötür - VİDEO
Bir kərə yüksələn bayraq bir daha enməz!
Qurban Qurbanov robot qapıçıya qol vurmağa çalışacaq
Xalq artisti Amalya Pənahova dəfn olunub
“Anamı gecə ilə aparıb Laçında dəfn etdik” - 54 gün mühasirədə qalan şəxslə müsahibə
“Bu çöllər bizə lazım deyil... torpaqları qaytarmağa hazırıq...” - Paşinyanın kitabı başına bəla olub
Bayrağı düşmənə verməyən oğul - NATİQ QASIMOV
Türkiyə və Türkmənistan Trans-Xəzər qaz kəmərini müzakirə ediblər
“...Qırmızı koftalı, yaşıl tumanlı...” — Xan Şuşinski bayrağımızı gizli musiqi ilə vəsf etmişdi